POESIE IN DIALETTO GENOVESE : A CIGAA E O GRILLO

ANTICHE POESIE LIGURI IN DIALETTO GENOVESE
A Cigaa e o Grillo
La Cicala e il Grillo



L'ea do meize là de stae,
Quanro o sò, co-e reue affoghae
e bruxando ciù un tisson,
o va a villezzà da-o Lion,
che unn-a sciolla de Cigaa
a cantò, sensa grattà,
tutto o giorno, con fruscià
co-a so voxe destonà.
Tanti insetti sò vexin,
finalmente a desse fin
co-a sò muxica arraggià
quando o Sò se cacciò in ma.
Sciortì alloa da sò tannetta
un Grilletto e o principiò
a cantà a sò cansonetta
comme a moddo de rondò,
ch'o no a voeiva ciù finì.
A Cigaa chi aveiva veuggia,
perchè stanca, de dormì,
a s'avansa da unn-a feuggia
e a ghe dixe in ton ardio:
e coscì! Ti hae ancon finio
brutto insetto, de cantà?
chi nisciun peu ciù quetà!
Se tiavesci comme a mae
unn-a voxe baella assae,
te soffrieivo, ma in sentì
sempre fa grigrì-grigrì,
tanta raggia ti me metti
che te faivo in menissetti:
taxi dunque e n' insordì
chi ha bezeugno de dormì.
Ghe rispose o Grillo: caa,
fa o piaxei, no t'arraggià,
mi no so se o mae cantà
o l'arrive a-o tò cigaa,
ma pe-o gusto e l'armonia
a l'è a stessa scinfonia:
Tutto o giorno ti he cantou
sensa mai piggià respio,
che ti m'hae quaexi insordio,
t'hò sofferto e n'ho parlou.
Se oua canto un pittin mì,
taxi dunque, e soffri tì.
A-o mondo quanta gente
pretende impunemente
o proscimo seccà
co-i faeti e co parlà,
e lo no veuan soffrì
nisciun nè fa, ne dì!